तीन छठ्ठी पर्व

तीन छठ्ठी पर्व कपिलवस्तु क्षेत्रमा मधेशी समुदायका महिलाहरूले विशेष श्रद्धाका साथ मनाउने परम्परागत उत्सव हो। यस दिन महिलाहरूले आफ्ना छोराहरूको लामो आयु र समृद्धिको लागि व्रत बस्ने गर्दछन् भने सन्तान नभएकाहरूले सन्तान प्राप्तिको कामना गर्दछन्। व्रतालुहरूले कपिलवस्तुको निगालीकोट, तौलिहवास्थित विभिन्न धार्मिक र सार्वजनिक स्थलहरूमा भेला भई सामूहिक रूपमा पूजापाठ गर्ने गर्दछन्।

पर्वको मुख्य विधिअनुसार महिलाहरूले बिहानै स्नान गरी महुवाको दतिवन प्रयोग गर्ने र दिनभर उपवास बस्ने परम्परा छ। पूजाका क्रममा कुशको घाँस, महुवा र तिन्नी नामको चामललाई विशेष महत्वका साथ चढाइन्छ। प्रसादका रूपमा दही, बेसार, चामल र चनलाई मिसाएर तयार पारिन्छ। व्रतको समापनमा हलो नजोतिएको खेतमा फल्ने जङ्गली धानको भात (तिन्नी) र साग खाने चलन रहेको छ। यो पर्वसँग एउटा पौराणिक कथा जोडिएको छ, जसमा तीन छठ्ठी देवीको व्रतको प्रभावले एक मृत बालकले पुनर्जीवन पाएको विश्वास गरिन्छ।