कोदो महोत्सव

पोखरा महानगरपालिका–२२ को कोदीमा २०८३ साउन १७ गते शनिबार दोस्रो संस्करणको कोदो महोत्सव आयोजना गरिनेछ। पुम्दी–भुम्दी कृषि सहकारी संस्था, पोखरा महानगरपालिकाको आर्थिक विकास महाशाखा र कृषि विकास महाशाखाको संयुक्त आयोजनामा हुने यस महोत्सवको मुख्य उद्देश्य कोदो खेतीको प्रवद्र्धन, स्थानीय उत्पादनको संरक्षण तथा पोषणयुक्त खाद्यान्नको प्रचारप्रसार गर्नु हो।

महोत्सवमा कोदोका विभिन्न जातको प्रदर्शनी, खेतीसम्बन्धी सहजीकरण तथा परामर्श, कोदो रोपाइँ प्रतियोगिता र कृषक तथा उपभोक्ताबीच अन्तरक्रिया जस्ता कार्यक्रमहरू राखिएका छन्। आगन्तुकहरूका लागि करिब १० प्रकारका कोदोबाट बनेका परिकारहरूको प्रदर्शन र स्वाद लिने व्यवस्था मिलाइएको छ। स्थानीय कला–संस्कृतिको संरक्षणका लागि भजन–कीर्तन तथा अन्य सांस्कृतिक कार्यक्रमहरू पनि समावेश गरिनेछन्।

पोखरामा परम्परागत रूपमा उत्पादन हुँदै आएका पागुनो, डल्ले, काबुनो, चिनो, भोगे सामा, जुनेली र धानकोदो जस्ता जातका कोदो प्रदर्शनी गरिनेछ। कोदोलाई पोषणयुक्त मानिन्छ किनभने यसमा आइरन, फस्फोरस, क्याल्सियम, फाइबर जस्ता पोषक तत्त्वहरू प्रशस्त मात्रामा पाइन्छन्। पोखरा महानगरपालिकाले कोदो उत्पादनलाई प्रोत्साहन गर्न किसानका लागि प्रति किलोग्राम ९० रुपैयाँ समर्थन मूल्य पनि तोकेको छ, जहाँ हाल करिब ३ हजार ९५ हेक्टर क्षेत्रफलमा कोदो खेती हुँदै आएको छ।