Festa ta’ Santa Marija

Il-Festa ta’ Santa Marija f’Ħal Għaxaq, li ssir fit-12 u t-13 ta’ Awwissu 2026, din is-sena qed tiċċelebra l-400 anniversarju mit-twaqqif tal-Parroċċa. Għal din l-okkażjoni speċjali, is-Sezzjoni Żgħażagħ Stillieri, flimkien mat-Team tal-Għaxaq Music Festival, qed jorganizzaw żewġ serati mimlija mużika, kuluri u spettaklu fil-pjazza tal-lokalità.

Nhar l-Erbgħa, 12 ta’ Awwissu, wara l-marċ tat-tieni Tridu, il-pjazza ta’ Ħal Għaxaq se tinbidel f’ċelebrazzjoni ta’ kulur u mużika bl-avveniment 'Night of Colors – Lejl tal-Lwien'. Se jkun hemm esebizzjoni mill-band ta’ Kirsten Graham flimkien mal-kantanti Claudia Faniello, Sarah Bonnici u Owen Luellen. Il-lejla se tinkludi wkoll Pyro Musical Show, li jgħaqqad spettaklu pirotekniku sinkronizzat mal-mużika, u 3D Visual Mapping fuq erba’ skrins.

Il-Ħamis, 13 ta’ Awwissu, iċ-ċelebrazzjonijiet ikomplu b''400 Years Together – Our Parish… Our Party', serata ddedikata b’mod partikolari għall-anniversarju tal-Parroċċa. Wara l-marċ il-kbir tal-aħħar Tridu, il-pjazza se tilqa’ lill-mistiedna speċjali mir-Renju Unit, Marcela Woods, għal live PA flimkien ma’ JJoy. Din is-serata se tkun imżejna b’visuals 3D, lasers, dwal u diversi effetti speċjali oħra.

Permezz ta’ dawn iż-żewġ iljieli, l-organizzaturi għandhom l-għan li jgħaqqdu t-tradizzjoni tal-festa ma’ elementi moderni ta’ spettaklu, filwaqt li jiċċelebraw l-għaqda u s-sens ta’ appartenenza fost il-komunità Għaxqija.