Првиот фестивал на кинески филмови

Целта на Првиот фестивал на кинески филмови е да ја доближи современата кинеска кинематографија до македонската публика преку приказни за семејството, личниот избор, секојдневниот живот, имагинацијата и традицијата. Фестивалот нуди избор од современи кинески играни, документарни, анимирани и кратки филмови.

Отворањето на фестивалот е со проекцијата на филмот „Сонцето изгрева над сите нас“ на режисерот Цаи Шангџун, кој беше дел од официјалната конкуренција на Венецискиот филмски фестивал, каде актерката Син Жилеи ја освои наградата „Волпи куп“ за најдобра актерка. Програмата вклучува и филмови како „24 вкуса“, „Кога ноќта ја среќава светлината“, „Сликарот на ковчези“, „Како камен што се тркала“, „Лов на чудовишта“, „Лов на чудовишта 2“ и анимираниот филм „Пад во светот на смртниците“, како и специјална програма со наградувани кратки филмови од млади кинески автори.

Проекциите во Скопје ќе се одржуваат во Кинотеката на Северна Македонија и во Киноверзум Кисела Вода. Филмската програма ќе гостува и во Центарот за култура во Битола, Занаетчискиот дом во Куманово, Киноверзум Велес и библиотеката „Искра“ во Кочани. Во рамки на фестивалот е предвиден и разговор со режисерката Тијан Јан по проекцијата на документарниот филм „Кога ноќта ја среќава светлината“, посветен на менталното здравје на децата и адолесцентите.