WEAVING

Претставата „WEAVING“ е продукција на Танц Бункер – Платформа за независен танц и претставува дијалог меѓу две кореографски перспективи. Во неа, физичките и музичките форми се среќаваат, повторуваат, разградуваат и повторно се обликуваат. Како појдовна точка, авторките користат ритуални обичаи од македонското културно наследство, вклучувајќи ја традицијата на плетење коса и машкото оро „Тешкото“. Овие елементи се реконтекстуализираат и фрагментираат, отворајќи поинакво читање преку телото и неговите односи.

Перформансот ја брише границата помеѓу современиот танцов перформанс и концерт изведен во живо, поврзувајќи ги движењето, звукот и непосредното присуство на изведувачите. Делото ги истражува односите меѓу телата и нивната поврзаност, како и редефинирањето и ослободувањето од структурите што самите ги создаваат, низ ритуалите на секојдневните навики. Музичкиот слој е изграден преку деконструирани ритмички секвенци, тапани во живо и синтисајзерски звуци. Претставата е структурирана во два дела, а во изведбата учествуваат Нина Петрушевска, Тереза Лазарев, Александра Петрушевска и Адријана Данчевска-Ровчанин. Музиката во живо ја изведуваат Александар Гроздановски на синтисајзери и Дарио Циевски на тапани.