Флипбук филм фестивал

Седмото издание на меѓународниот фестивал за анимиран филм „Флипбук филм фестивал“ ќе се одржи во Скопје од 3 до 9 август 2026 година. Фестивалот, кој е проширен на седум фестивалски дена, ќе прикаже вкупно 185 анимирани филмови на три локации: КОТУР, Кинотеката и просторот „Sе“. Официјалното отворање е закажано за 6 август во паркот на Кинотеката.

Програмата се состои од шест фестивалски селекции, вклучувајќи ја главната конкуренција со современи авторски филмови, студентска програма, анимирани документарци, анимирани музички видеа и Европска панорама. Посебна нова програма, „Бумбар“, е наменета за деца над седум и за млади над дванаесет години. Освен проекции, фестивалот нуди и богата придружна програма која опфаќа работилници за изработка на флипбук, развој на сценарио и продукција на краток анимиран филм со еколошка тематика. Посетителите ќе можат да присуствуваат и на мастер-класови со членовите на жирито и да ги посетат изложбите „Between Frames“ со цртежи, кукли и сценографии од авторите учесници.