Бич филм фестивал

Деветтото издание на „Бич филм фестивал“ во Охрид, кое се одржа од 22 до 26 јули, го потврди својот препознатлив концепт – филмот доживеан под отворено небо, со езерото како природна сценографија. Програмата опфати проекции на македонски и меѓународни кратки и долгометражни филмови, вклучувајќи ги „Silent Cinema“, „Ordinary Hero“, „Приказната за Силјан“ и „Broken Voices“.

Оваа година, Република Турција беше земја во фокус, со поддршка од турското Министерство за култура и туризам. Во рамките на фестивалот се одржа Турска филмска вечер на бродот „Армада“ на Охридското Езеро, каде беше прикажан филмот „Еден од оние денови кога Хеме умира“ во присуство на режисерот Мурат Фиратоглу. Исто така, беше прикажан и филмот „Како што дишеме“ на режисерот Шејмус Алтун, со што се зајакна културната дипломатија и професионалното вмрежување.

На свеченото затворање, одржано на плажата „Славија“, беа доделени награди во повеќе категории, вклучувајќи „Најдобар филм“ за „Broken Voices“, „Најдобро актерско остварување“ – награда „Стефан Сидовски – Сидо“ за Катержина Фалброва, „Најдобар краток филм“ за „On Weary Wings Go By“ и „Најдобар студентски филм“ за „Tilting at Windmills“. Фестивалот служеше и како платформа за средби со филмски професионалци и промоција на туристичкиот потенцијал на Турција.