Pchum Ben Festival

ពិធីបុណ្យភ្ជុំបិណ្ឌនេះ ត្រូវបានរៀបចំឡើងយ៉ាងអធិកអធម និងប្រព្រឹត្តទៅក្នុងបរិយាកាសស្និទ្ធស្នាល រីករាយ។ ពិធីនេះសហការរៀបចំដោយមជ្ឈមណ្ឌលព្រះពុទ្ធសាសនាគូមី វត្តខ្មែរគូមី និងពុទ្ធបរិស័ទចំណុះជើងវត្ត និងតំបន់ជុំវិញ។ វត្តមានមន្ត្រីជាន់ខ្ពស់កម្ពុជា រួមមាន លោក សេង សក្តា រដ្ឋលេខាធិការតំណាងលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក ឃួន ផុនរតនៈ ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ ក៏បានអញ្ជើញចូលរួមផងដែរ។

ក្នុងឱកាសនោះ លោករដ្ឋលេខាធិការ និងលោកឯកអគ្គរាជទូតបានពាំនាំនូវការសួរសុខទុក្ខ និងការគិតគូរយ៉ាងជ្រាលជ្រៅបំផុតពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះបងប្អូនពលករទាំងអស់ដែលកំពុងស្នាក់នៅ និងធ្វើការនៅសាធារណរដ្ឋកូរ៉េ។ ពួកគេក៏បានក្រើនរំលឹក និងលើកទឹកចិត្តឱ្យបងប្អូនពលករទាំងអស់បន្តខិតខំប្រឹងប្រែងបំពេញការងារ ប្រកាន់ខ្ជាប់នូវវិន័យ គោរពច្បាប់ និងការណែនាំរបស់អាជ្ញាធរកូរ៉េ ដើម្បីចូលរួមចំណែកលើកស្ទួយកិត្តិយស កិត្យានុភាព និងសេចក្តីថ្លៃថ្នូររបស់ប្រជាជាតិខ្មែរលើឆាកអន្តរជាតិ។ ពិធីនេះបានឆ្លុះបញ្ចាំងយ៉ាងច្បាស់អំពីទឹកចិត្តស្រឡាញ់វប្បធម៌ និងស្មារតីចងចាំជាតិមាតុភូមិរបស់បងប្អូនប្រជាពលរដ្ឋខ្មែរនៅឯក្រៅប្រទេស។