ពិព័រណ៍ “មហាសមុទ្រនៃសំណល់ប្លាស្ទិក”

ក្រុមហ៊ុនណាហ្គាវើលដ៍ បានបើកសម្ពោធជាផ្លូវការនូវពិព័រណ៍ “មហាសមុទ្រនៃសំណល់ប្លាស្ទិក” ដែលមានទីតាំងនៅណាហ្គាវើលដ៍ទី១ រាជធានីភ្នំពេញ។ ពិព័រណ៍នេះបើកជូនសាធារណជនចូលទស្សនាដោយសេរីជារៀងរាល់ថ្ងៃ រហូតដល់ថ្ងៃទី២៣ ខែសីហា ឆ្នាំ២០២៦។ គោលបំណងសំខាន់នៃពិព័រណ៍នេះ គឺដើម្បីលើកកម្ពស់ការយល់ដឹងអំពីផលប៉ះពាល់នៃការបំពុលដោយប្លាស្ទិក ដែលកំពុងគំរាមកំហែងដល់ទន្លេ និងប្រព័ន្ធអេកូឡូស៊ីសមុទ្រនៅកម្ពុជា ក៏ដូចជាបំផុសគំនិតឱ្យមានសកម្មភាពរួមគ្នាដើម្បីអនាគតដែលស្អាត និងមានចីរភាព។

ក្នុងពិព័រណ៍នេះ មានការតាំងបង្ហាញស្នាដៃច្នៃប្រតិដ្ឋជាច្រើន ស្នាដៃសិល្បៈរបស់សិស្សានុសិស្ស និងផលិតផលនវានុវត្តន៍ដែលធ្វើឡើងពីប្លាស្ទិកកែច្នៃ ១០០% ដោយក្រុមហ៊ុនហ្គោមី រីសាយខល។ ការដាក់តាំងបង្ហាញទាំងនេះ បង្ហាញយ៉ាងច្បាស់ថា សំណល់ប្លាស្ទិកដែលត្រូវបានបោះចោល អាចប្រែក្លាយទៅជាស្នាដៃដ៏មានអត្ថន័យ និងមានតម្លៃជាថ្មីតាមរយៈគំនិតច្នៃប្រតិដ្ឋ។ លោកជំទាវ ឃុន រចនា អនុរដ្ឋលេខាធិការក្រសួងអប់រំ យុវជន និងកីឡា បានកោតសរសើរចំពោះគំនិតច្នៃប្រតិដ្ឋ និងសារអប់រំបរិស្ថាននៃពិព័រណ៍នេះ។

ជាផ្នែកមួយនៃយុទ្ធនាការនេះ ណាហ្គាវើលដ៍បេះដូងសប្បុរស ដែលជាផ្នែកការងារចីរភាព និងទំនួលខុសត្រូវសង្គមរបស់ក្រុមហ៊ុនណាហ្គាវើលដ៍ ក៏បានរៀបចំការប្រកួតប្រជែងនៅលើបណ្តាញសង្គមហ្វេសប៊ុកផងដែរ។ សាធារណជនត្រូវបានលើកទឹកចិត្តឱ្យចែករំលែករូបថត ឬវីដេអូអំពីពិព័រណ៍នេះដើម្បីចូលរួមផ្សព្វផ្សាយ និងមានឱកាសឈ្នះរង្វាន់។ ពិព័រណ៍នេះគឺជាការរួមចំណែកដ៏សំខាន់ក្នុងការជំរុញឱ្យសហគមន៍ ជាពិសេសយុវជន គិតគូរឡើងវិញអំពីការប្រើប្រាស់ និងការបោះចោលប្លាស្ទិក។