ពិធីដង្ហែទៀនព្រះវស្សា

ពិធីដង្ហែទៀនព្រះវស្សា គឺជាប្រពៃណីដ៏ល្អផូរផង់របស់ព្រះពុទ្ធសាសនា ដែលប្រជាពលរដ្ឋខ្មែរបានប្រតិបត្តិបន្តពីដូនតាមក។ ពិធីនេះបានប្រព្រឹត្តទៅនៅព្រឹកថ្ងៃទី២៧ ខែកក្កដា ឆ្នាំ២០២៦ នៅវត្តឈូកត្រសាលរស្មីមានជ័យ ហៅវត្តឈូក ដែលមានទីតាំងស្ថិតនៅភូមិបុស្ស ឃុំខ្នារពោធិ ស្រុកសូទ្រនិគម ខេត្តសៀមរាប។

ក្នុងព្រឹត្តិការណ៍នេះ នាយឧត្តមសេនីយ សឹង សំណាង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងអាកាស បានដឹកនាំនាយទាហាន អាជ្ញាធរដែនដី និងពុទ្ធបរិស័ទជាច្រើននាក់ ដើម្បីដង្ហែទៀនព្រះវស្សា។ ពួកគេក៏បាននាំយកទៀនព្រះវស្សា ថវិកា និងទេយ្យវត្ថុជាច្រើនមុខ ប្រគេនដល់ព្រះសង្ឃដែលគង់ចាំព្រះវស្សា។ សកម្មភាពនេះធ្វើឡើងក្នុងគោលបំណងគាំទ្រដល់ព្រះសង្ឃ និងរួមចំណែកថែរក្សា លើកស្ទួយព្រះពុទ្ធសាសនា ដែលជាសាសនារបស់រដ្ឋ ឱ្យស្ថិតស្ថេរគង់វង្ស។

បន្ថែមពីលើពិធីសាសនា នាយឧត្តមសេនីយ សឹង សំណាង ក៏បានចែកអំណោយជាគ្រឿងឧបភោគ បរិភោគ សម្ភារប្រើប្រាស់ និងថវិកាមួយចំនួន ជូនដល់គ្រួសារដែលបានបាត់បង់ផ្ទះសម្បែងដោយសារគ្រោះអគ្គិភ័យមួយគ្រួសារ។ ជាមួយគ្នានោះ លោកក៏បានចែកអំណោយជាសារ៉ុងពុម្ព និងថវិកា ជូនដល់តាយាយជាពុទ្ធបរិស័ទចំនួន ១៥៣ នាក់ ថែមទៀតផង។