Nepal Street Festival

अमेरिकाको मेरिल्याण्ड राज्यस्थित बाल्टिमोरमा आयोजना भएको नेपाल सडक महोत्सव २०२६, नेपाली कला, संस्कृति, परम्परा तथा सम्पदालाई अन्तर्राष्ट्रियस्तरमा प्रवर्द्धन र प्रचार–प्रसार गर्ने उद्देश्यले मनाइएको थियो। "हाम्रो संस्कृति, सम्पदा र समुदायको उत्सव" भन्ने मूल नाराका साथ बाल्टिमोर एसोसिएसन अफ नेपालीज इन अमेरिका (बाना) को अगुवाइमा आयोजना गरिएको यो महोत्सवको यस वर्ष आठौँ संस्करण थियो।

यस महोत्सवमा नेपाली समुदायका विभिन्न जातीय तथा क्षेत्रीय संघ संस्थाहरूले आ–आफ्ना मौलिक संस्कृति, परम्परा र पहिचान झल्काउने विभिन्न झाँकीहरू प्रस्तुत गरेका थिए। कार्यक्रममा नेपालका ख्यातिप्राप्त कलाकारहरूले सांस्कृतिक प्रस्तुति दिनुका साथै नेपाली संगीत, नृत्य, हस्तकला र विभिन्न स्वादिष्ट नेपाली खानाका परिकारहरूको प्रदर्शन तथा बिक्री गरिएको थियो।

महोत्सवको प्रमुख उद्देश्य नेपाली कला तथा संस्कृतिलाई अमेरिकी समुदायमाझ परिचित गराउँदै नेपाल र अमेरिकाबीचको सांस्कृतिक सम्बन्धलाई थप सुदृढ बनाउनु थियो। साथै, विदेशी पर्यटकहरूलाई नेपाल भ्रमणका लागि आकर्षित गरी नेपालको प्राकृतिक तथा पर्यटकीय सम्पदाको प्रचार–प्रसार गर्नु पनि यसको लक्ष्य रहेको आयोजक संस्थाले जनाएको थियो।

यो महोत्सव नेपाली दूतावास, वासिङ्टन डीसी, गैरआवासीय नेपाली संघ (एनआरएनए) अमेरिका तथा नेपाल पर्यटन बोर्ड लगायतका संस्थाहरूसँगको सहकार्यमा आयोजना गरिएको थियो। यस पटक भोटेकोशी बाढी तथा पहिरोबाट प्रभावित नागरिकको राहत तथा पुनःस्थापनाका लागि सहयोग जुटाउन पनि आह्वान गरिएको थियो।