ФЛУДО – фестивал за еко култура и креативен активизам

ФЛУДО, организиран од Еко-свест, е нов фестивал кој ги надминува традиционалните модели на информирање за еколошките теми. Наместо едностран пренос на информации, фестивалот гради партнерства со независни културни центри, фестивали и уметници, со цел еколошкото знаење да стане дел од нивната работа и да стигне до поширок круг на луѓе. Името ФЛУДО е инспирирано од водата и реката, симболизирајќи движење, поврзување и трансформација.

Програмата на фестивалот вклучува различни уметнички и едукативни формати. Посетителите ќе можат да присуствуваат на работилници за стоп анимација, театар на сенки, циајнотипија, сито печат и креативно рециклирање. Дел од настанот е и Еко трампа, посветена на циркуларната економија, како и проекции на кратки документарни филмови кои обработуваат еколошки теми.

Музичката програма нуди соработка меѓу визуелниот уметник Владимир Лукаш, композиторот Ѓорѓи Шаревски и диригентот Џијан Емин. Ќе настапат и Хана Корнети, Јована Ристеска и ди џеј Шурбе, а последната вечер ќе се одржи концертот TRANSMISSION со Александар Петров и Томи Анчов. Во рамките на фестивалот ќе биде претставена и поставка со дела создадени на работилниците, како и разговор насловен „Мојот пат“, модериран од писателката Румена Бужаровска.