Скопски градски фестивал

Скопскиот градски фестивал во своето седмо издание промовира регионална соработка, доведувајќи уметници од Македонија, Словенија, Албанија, Грција, Црна Гора и Бугарија. Програмата ги поврзува џезот, класичната музика, современото авторско творештво и балканското музичко наследство преку специјално создадени проекти и премиерни изведби. Организатор на фестивалот е „Баги Комуникации“, со цел да се создаде простор за средби и заедничко творештво на музичарите.

Меѓу учесниците се словенечкиот саксофонист Васко Атанасовски, меѓународно афирмираниот македонски контрабасист Мартин Ѓаконовски, албанскиот пијанист и композитор Gent Rushi и грчкиот хармоникаш Thanos Stavridis, кои ќе изведат заедничко дело. Пијанистката Милјана Николиќ ќе претстави проект посветен на современи балкански композитори, а македонскиот гитарист Мухамед Ибрахими ќе има самостоен настап. Дуото Антонио Илиоски и Јана Василева Лолова ќе го промовираат албумот „Beyond The Silence“.

Сите концерти ќе се одржуваат во камерната сала на Македонската филхармонија, со исклучок на настапот на младата група „Фрекфенција“ која на 20 септември ќе настапи на летната сцена „Лепеза“ во Градскиот парк. Фестивалот, основан во 2021 година, досега обедини над 100 уметници и иницираше бројни нови уметнички соработки, градејќи препознатлив програмски идентитет.