Континуитети

Изложбата „Континуитети“, организирана од Македонската академија на науките и уметностите (МАНУ), има за цел да претстави дел од исклучителното уметничко наследство и творештвото на автори кои оставиле траен белег во македонската ликовна уметност. Во фокусот се академиците-уметници, членови на МАНУ, чие творештво претставува еден од најзначајните сегменти во развојот на македонската современа уметност. Поставката овозможува увид во индивидуалниот творечки придонес на секој автор, како и поширока слика за уметничките процеси, вредности и поетики што ја одбележале македонската уметност во текот на повеќе децении.

Изложбата го следи творечкиот континуитет на македонската уметничка средина, од темелните модернистички определби, преку развојот и афирмацијата, до современите уметнички позиции. Меѓу авторите застапени на изложбата се Никола Мартиноски, Димче Коцо, Вангел Коџоман, Димо Тодоровски, Димитар Кондовски, Јордан Грабулоски – Грабул, Петар Хаџи Бошков, Томе Серафимовски, Васко Ташковски, Влада Урошевиќ, Боро Митриќески, Младен Србиновиќ, Газанфер Бајрам, Киро Урдин, Глигор Чемерски, Омер Калеши, Невзат Бејтули – Кица, и Жарко Башески.

„Континуитети“ е продолжение на соработката меѓу МАНУ и ЦАНУ, по претходна изложбена средба во Скопје. Оваа возвратна изложба во Подгорица ја зацврстува комуникацијата меѓу двете академии и ја истакнува важноста на културната размена. Отворањето ќе вклучува обраќања од акад. Павле Горановиќ, секретар на Одделението за уметност на ЦАНУ, доп. член Жарко Башески како учесник на изложбата, и Ивана Димов Џолева, координатор на поставката, а свеченоста ќе биде збогатена со музички настап на доп. член Драган Даутовски.