Pchum Ben Festival

ពិធីបុណ្យភ្ជុំបិណ្ឌនេះ ត្រូវបានរៀបចំឡើងដោយសហការគ្នារវាងមជ្ឈមណ្ឌលព្រះពុទ្ធសាសនាគូមី វត្តខ្មែរគូមី និងពុទ្ធបរិស័ទចំណុះជើងវត្ត និងតំបន់ជុំវិញ។ ពិធីនេះប្រព្រឹត្តទៅក្នុងបរិយាកាសរីករាយ និងស្និទ្ធស្នាល ដើម្បីឧទ្ទិសកុសលផលបុណ្យដល់បុព្វការីជន និងជាឱកាសសម្រាប់សហគមន៍ខ្មែរជួបជុំគ្នា។

វត្តមានមន្ត្រីជាន់ខ្ពស់កម្ពុជាក៏បានអញ្ជើញចូលរួមផងដែរ រួមមាន លោក សេង សក្តា រដ្ឋលេខាធិការតំណាងលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក ឃួន ផុនរតនៈ ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ។ ពួកគាត់បានពាំនាំនូវការសួរសុខទុក្ខពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះបងប្អូនពលករខ្មែរទាំងអស់នៅទីនោះ។

លើសពីនេះ មន្ត្រីទាំងពីររូបក៏បានក្រើនរំលឹក និងលើកទឹកចិត្តដល់ពលករឱ្យបន្តខិតខំប្រឹងប្រែងបំពេញការងារ ប្រកាន់ខ្ជាប់នូវវិន័យ គោរពច្បាប់ និងការណែនាំរបស់អាជ្ញាធរកូរ៉េ។ នេះដើម្បីរួមចំណែកលើកស្ទួយកិត្តិយស កិត្យានុភាព និងសេចក្តីថ្លៃថ្នូររបស់ប្រជាជាតិខ្មែរលើឆាកអន្តរជាតិ។ ពិធីនេះបានបង្ហាញយ៉ាងច្បាស់ពីទឹកចិត្តស្រឡាញ់វប្បធម៌ និងស្មារតីចងចាំជាតិមាតុភូមិរបស់ប្រជាពលរដ្ឋខ្មែរនៅឯបរទេស។