Фестивал на македонски филм

Второто издание на патувачкиот Фестивал на македонски филм во Сплит, Хрватска, се одржа на 11 и 12 септември 2026 година. Првата вечер беше посветена на етнолошките филмови на Вера Кличкова, прикажувајќи ги „Мариовска свадба”, „Велигденски обичаи” и „Русалиски обичаи во Гевгелија”. Вишиот филмолог Дамјана Ивановска Патчева и филмскиот техничар Тихомир Кашмицовски од Кинотеката на Македонија одржаа вовед, нагласувајќи ја важноста на зачувувањето на етнолошкиот филм како дел од филмското наследство.

Фестивалот продолжи со трибина насловена „Дијалог на кадри – улогата на Кинотеката на Македонија во заштитата на филмското наследство и меѓународната промоција на македонската кинематографија”, која се одржа во просториите на Македонското културно друштво „Македонија” Сплит. Вечерната програма заврши со проекцијата „Македонски оскаровци” во кинотеката на Центарот за култура „Златна врата”, каде беа прикажани филмовите „Дае” („Мајка”) на Столе Попов и „Медена земја” на Тамара Котевска.

Овој настан беше организиран од Македонскиот КИЦ во Загреб во партнерство со Кинотеката на Македонија и хрватската мрежа на независни киноприкажувачи. Изданието во Сплит се одржа во соработка со Македонското културно друштво „Македонија” Сплит и Центарот за култура „Златна врата”. Во текот на месеците септември и октомври 2026 година, Фестивалот на македонски филм продолжува во вкупно 11 градови низ Хрватска, одбележувајќи 35 години независност.